Ashtu si pranvera që zgjon natyrën me çeljen e luleve të para, edhe muaji mars në Teatrin Kombëtar të Operës, Baletit dhe Ansamblit Popullor vjen si një kopsht i gjallë artistik, ku çdo mbrëmje është një petale e freskët e muzikës, baletit dhe traditës.
Nga prezantimi i kulturës shqiptare në skenën ndërkombëtare të ITB Berlin, te programet edukative për të rinjtë me “Eja këndo me ne”, deri te emocionet e baletit “Lola” dhe turneu i operës “L’elisir d’amore”, ky muaj sjell një larmi ngjyrash dhe tingujsh që pasurojnë jetën kulturore.
Publiku do të përjetojë gjithashtu koncerte që shpalosin shpirtin shqiptar dhe atë botëror, duke filluar nga recitalet vokal-instrumentale “Albanian Soul” dhe “Malinconia”, te koncerti simfonik me kryevepra të Prokofiev dhe Rachmaninov, si dhe koncerti premierë i Ansamblit Kombëtar të Këngëve dhe Valleve Popullore, “Me zanin e bjeshkëve”.
Në këtë muaj që simbolizon rilindjen dhe bukurinë e natyrës, TKOBAP fton publikun të bëhet pjesë e një pranvere artistike, ku muzika, zëri dhe lëvizja çelin si lulet e para të sezonit.