Ndërron jetë mjeshtri i madh i baletit shqiptar, Albert Janku

Është ndarë nga jeta në moshën 83-vjeçare, “Mjeshtri i Madh” i baletit shqiptar Albert Janku.

Janku e nisi karrierën si balerin në vitin 1955 në Teatrin e Operas dhe Baletit si profesionit.

Ndërsa në skenën shqiptare, Janku ka me dhjetëra role ndër vite, fama e tij si artist ka kaluar dhe kufijtë shqiptarë.

Në shumë prej shfaqjeve me trupën e baletit të cilat janë vënë në skenat e botës, Janku ka spikatur për talentin e tij, duke marrë shumë vlerësime nga kritika dhe publiku.

Albert Janku është nderuar me titullin “Artist i merituar” dhe për dekada me radhë solist i parë i TOB.

Lajmin e trishtë e bën me dije Teatri i Operas dhe Baletit përmes një mesazhi në rrjetet sociale.

“Teatri Kombëtar i Operës, Baletit dhe Ansamblit Popullor, me hidhërim të thellë mësoi për ndarjen nga jeta, në moshën 83 – vjeçare, të një nga figurave më të spikatura të Baletit, Artistit të Merituar” Albert Janku.

Një ndër solistët e parë të baletit shqiptar, i cili ka zënë një vend të rëndësishëm nderi në jetën artistike dhe në skenën e Teatrit të Operas dhe Baletit. Një karrierë që e nisi në vitin 1955 si kërcimtar e si solist i baletit dhe për 40 vite me rradhë i dhuroi skenës shqiptare me dhjetra role. Spikasin rolet në baletet kombëtare si atë të Jonuz Bruges në baletin “Bijtë e Peshkatarit”, të komisarit në baletin “Fatosi Partizan” të Benit në rapsodinë koreografike “Historia e një kënge”, atë te Bektash Agës në baletin “Halili dhe Hajria”, të Don Markut në baletin “Cuca e Maleve”. Interpretues i shumë roleve edhe në baletet e huaja të vëna në skenë nga Teatri i Operas dhe Baletit si në baletin “Francesca da Rimini”, baletin “Lola”, “Fadeda”, “Zhurale”, “Laurencia”, “Don Kishot: etj. Albert Janku ka marrë pjesë edhe në një seri numrash koncertalë të dhëna në TKOB dhe jashtë kufijve të vendit me trupën e baletit dhe atë të Ansamblit të Këngëve dhe Valleve Popullore, ku ka spikatur talenti i tij duke marrë vlerësime nga kritika e publiku. Nderuar me titullin “Artist i Merituar”, edhe pse në moshë të thyer nuk u shkëput nga ky teatër, duke ndjekur me vëmendje çdo shfaqje që është vënë në skenë. Nuk ka munguar kontributi i tij edhe në fushën e pedagogjisë, si koorepetitor, konsulent në mjaft balete, autor i shumë artikujve mbi baletin, portrete artistësh e monografish.

Në emër të drejtuesve dhe artistëve të TKOBAP-së, i shprehim ngushëllime familjes, miqve dhe kolegëve të botës së baletit e artit.

U prehtë në paqe!”.

https://newsbomb.al/nderron-jete-mjeshtri-i-madh-i-baletit-shqiptar-albert-janku/