Teatri Kombëtar i Operës dhe Baletit  e nisi këtë vit artistik me koncertin “Serenatat në Opera” te “arTuribna”. Është një cikël koncertesh që janë menduar të zhvillohen me artistët e TOB për publikun dhe hapja u bë mbrëmë me serenatat, por vepra premierë. TOB bën me dije se veprat erdhën si premierë absolute për publikun. “Në “arTurbina” si premierë absolute Serenatat e Elgar dhe Çajkovski, të prezantuara nga Formacioni i Harqeve të TOB”, shkruan teatri për këtë koncert, që do ti lërë më pas radhën dhe një tjetër koncerti mbrëmjen e sotme po te kjo skenë.  Tingujt e muzikës së kompozitorëve të njohur botërorë erdhën nën interpretimin e artistëve të TOB dhe drejtues i formacionit të harqeve në koncertin mbrëmshëm ishte Gëzim Bulçari. Dirigjenti i njohur Edmond Doko i vlerëson këto koncerte. “Janë formacione të vogla, janë koncerte ku përfshihen grupe nga orkestër ose solistë të veçantë sipas rastit. Në mungesë të një salle gjendet një rrugë alternative për ti shkuar spektatorëve vepra të muzikës së dhomës. Ne mbajmë të gjallë kontaktin me publikun, por nga ana tjetër rrisim dhe nivelin artistik të trupave. Orkestra e madhe ka tjetër program. Orkestra është zbërthyer në tre seksione kryesore dhe nga ana tjetër në bëjmë jetën muzikore, që nuk e bën dot orkestra e madhe. Pra të bësh Serenatën e Çajkovskit nuk mund ta bësh me gjithë orkestrën, por është e shkruar në një mënyrë që të interpretohet nga një grup instrumentesh”, tregon dirigjenti Doko. Gëzim Bulçari koncertmaestër i orkestrës së TKOBAP. Ai shquhet për interpretimet e tij virtuoze dhe me një muzikalitet të spikatur. Vjen për publikun artdashës në këtë premierë absolute “ Serenatat në Opera” si drejtuesi i formacionit orkestral por përgjatë këtyre viteve ka realizuar koncerte të shumta dhe recitale në bashkëpunim edhe me institucione të ndryshme kulturore në Shqipëri. Është iniciator i formacionit orkestral të “Primarëve të Operës”. Aktivitet që është vlerësuar nga specialistët e muzikës si iniciativë e rëndësishme për angazhimin artistik dhe pasurimin e jetës kulturore në vend.

 

Vepra dhe artistë në skenë

Pas Serenatave të autorëve Elgar dhe Çajkovski këtë të shtunë vijnë për publikun Haydn dhe Schubert. Veprat do të interpretohen nga Formacioni Frymor i TOB. Okteti i frymës i TOB i përbërë nga Enalda Gjoni, Dorela Ujkani, Erik Tauzi, Ilir Gjoka, Elton Katroshi, Erenik Behlula, Orges Malaj, Sadik Meniku, Ilir Kodhima, Vildan Mumajesi, mirëpresin sot publikun në koncertin e tyre ku do të interpretojnë për herë të parë Serenatat e Haydn dhe Schubert. Franz Schubert, një ndër kompozitorët më të shquar të muzikës përparimtare botërore dhe një ndër të parët romantikë. Schubert i këndoi jetës dhe dashurisë së njerëzve të thjeshtë me një pasuri të tillë melodish lirike, të cilat mund të krahasohen vetëm me ato të Mozart dhe të Chopin. Ai shkroi rreth 615 melodi,si dhe nëntë simfoni duke përfshirë të famshmen “Simfoninë e papërfunduar”, muzikë liturgjike, opera, muzikë të rastësishme dhe muzikë solo për piano. Haydn pjesën më të madhe të jetës ( rreth 30 vite ) i kaloj duke shërbyer në familjen aristokrate Esterhazi në Vjenë. Ishte i detyruar që në mënyrë të dëgjueshme ti kryente urdhrat, të punonte me orkestër, të kompozonte për nevojat e tij, të ushtronte instrumentistët dhe solistët vokal. Pas vitit 1790 Haydn jeton në Vjenë ku herë pas herë vizitonte edhe qendrat e tjera Evropiane ( Paris, Londër etj). Gjatë qëndrimit në Londër u njoh me veprat oratorike të Hendëllit të cilat ndikuan fuqishëm te ai që ti kompozonte “Krijimi i botës” dhe “Stinët e Vitit”. Pas këtyre dy koncerteve në vijim të këtij cikli janë dhe tre të tjerë që do të zhvillohen për publikun.